Усіх, хто ў той дзень прыйшоў ці прыехаў на свята, ад душы віталі ўдзельнікі канцэртна-тэатралізаванай праграмы «Макавеева кветка»: ансамбль «Астранка» і дзіцячы ўзорны фальклорны калектыў «Астраначка» мясцовага сельскага клуба, юныя танцоры з узорнага харэаграфічнага калектыву «Жывіца» Клімавіцкай дзіцячай школы мастацтваў, ансамбль песні і танца «Беразуха», удзельнікі народнага тэатра гульні «Гарэзы» і вакальная група народнага хору народнай песні раённага цэнтра культуры, самадзейныя артысты Раднянскага і Ціманаўскага сельскіх дамоў культуры, Мілаславіцкага сельскага цэнтра культуры і вольнага часу. А таксама прадстаўнікі творчых калектываў з Шумяцкага і Ершыцкага раёнаў Смаленскай вобласці.

Вядучымі канцэртнай праграмы былі дырэктар Клімавіцкай цэнтралізаванай клубнай сістэмы Сяргей Булянкоў і загадчыца аддзела па культуры і спорту Адміністрацыі муніцыпальнага ўтварэння «Шумяцкі раён» Ала Патапава.

На агульнай святочнай пляцоўцы, безумоўна, прыцягваў увагу маляўнічы і багаты падворак шэрагу сельскіх устаноў культуры Клімаўшчыны.
«Салодкі» гандлёвы рад пашырыўся ў параўнанні з мінулагоднім. Сваю якасную каштоўную прадукцыю (у тым ліку і ў сотах) прапаноўвалі дзесяць пчаляроў-аматараў Клімавіцкага раёна, а яшчэ — вытворчы ўчастак па пчалярству і развядзенню рыбы лікёра-гарэлачнага завода. Было чым наталіць смагу і падсілкавацца ў палатках раённага спажыўтаварыства.

Малым дзеткам прыносіла задавальненне з’есці пачку-другую марожанага ды паскакаць на батутах. Старэйшых хлапчукоў і дзяўчынак цягнула да вады, дзе індывідуальны прадпрымальнік Барыс Чарнякоў арганізаваў цікавае шоу.
Не адну гадзіну ля ціхага і прыгожага Астра лілася музыка, гучалі жарты і, вядома ж, цудоўныя песні ў выкананні беларускіх і расійскіх самадзейных артыстаў.

А 14 жніўня, на Макавея, ад вёскі Новы Дзедзін праваслаўныя вернікі накіраваліся да «Бяздоннага калодзежа». Хрэсны ход завяршыўся чарговым асвячэннем крыніцы. Гэты абрад правёў настаяцель Свята-Міхайлаўскага храма г. Клімавічы айцец Інакенцій. Павіншавала ўсіх удзельнікаў мерапрыемства са святам начальнік аддзела ідэалагічнай работы раённага выканаўчага камітэта Марыя Пракопчык.

Валянціна Кварцюк