Па словах Ірыны Фёдараўны, удзелу ў мерапрыемстве такога ўзроўню папярэднічала вялікая работа. Трэба было наладзіць краязнаўчую і пошукавую работу, вынікам якой стала адкрыццё школьнага музея. Праз некалькі год руплівая праца была ацэнена перамогай у абласным этапе конкурсу-агляду этнаграфічных музеяў і другім месцам на рэспубліканскім этапе гэтага конкурсу.

— Нашым музеем была прадстаўлена экспазіцыя, якая называлася «Мастацтва беларускай вышыўкі», праз паказ «Парада рушнікоў». Адметна, што большасць з іх мелі тэкставую вышыўку, што збірала і здзіўляла наведвальнікаў, — падкрэсліла Ірына Фёдараўна.

Шмат прыемных уражанняў засталося ў памяці юных удзельнікаў форума ад рыцарскіх баёў, выканаўцы якіх выступалі ў сапраўдным рыцарскім адзенні сярэднявечча, знаёмства з вядомым беларускім краязнаўцам В.А.Ермалёнкам, які запрасіў навучэнцаў Лабжанскай школы ў Міёры, дзе ён кіруе двума музеямі, а таксама з’яўляецца старшынёй клуба «Арганаўты мінулага». І, вядома ж, такая вялікая колькасць музеяў у адным месцы іншы раз аж захоплівала дух.

Пётр ШАШКОЎ, метадыст Клімавіцкага ЦТКіЭ